抗爭三十年 上善若水
細黃伯與黃太幾乎不會缺席任何一場爭取自由的遊行，約他訪問，你揀在6月9日在政府總部及立法會外，因為特別有意義。
過去一年，每次有遊行示威，總會見到一對老人身影，一高一矮，身形瘦削，男的戴住一頂帽，一副圓眼鏡，附上一條由多國國旗組成的眼鏡帶；女的一頭長白髮，慢慢地跟在男的後面，兩人跟在遊行大隊中，累了就坐下休息，休息夠了起身再行，幾乎不會缺席每一次可以出來爭取自由的機會。男的叫細黃伯，今年已經75歲，女的是黃太，同樣70有幾，一直陪在丈夫左右，寸步不離，齊上齊落。
約細黃伯訪問，他說就揀6月9 日，地點在政總外。6月9日政總外，意義重大，去年69，反修例抗爭的開始，香港轉變的起點。「去年今日，我同黃太就係喺呢到。」他指一指連接政總的天橋。
政府總部這地方，對細黃伯並不陌生。2014年傘運，他在此駐守超過200天，紥營抗議人大831政改方案落閘，當年他七十歲。2013年，中聯辦發稿稱2017普選特首，不會改變1200人提名委員會組成，會提名三人讓市民選擇，細黃伯知道後怒不可遏。
「嗰陣我七十歲，身體仲幾好，日日拎住啲爛橙，抬住易拉架，拉住車仔，全港18區去晒，用爛橙講畀市民知，要反篩選！」原來有一日他在超市買橙，見到售貨員將爛橙揀走，讓顧客揀餘下的橙，靈機一觸，其實中共就是要事先篩選。
「當年戴耀廷、陳健民同朱耀明佢哋搞個咩用愛與和平，我初初心諗你都戇居嘅，你同共產黨講愛？唔好搵個傳道人來？」然而與陳健民佢哋傾談之後，細黃伯明白在沒有對等武力下，萬一忍不住，只會送死，慢慢被陳健民同朱耀明感染，「佔咗79日之後，佢哋要撤去自首，但我話我唔會走，我來嘅宗旨就係要反對「831方案」，一日未表決，一日我都唔會走！」
細黃伯和一班堅持留守的人選擇轉移陣地，「嗰陣煲底係合法示威區，我哋去嗰到繼續紥營，之後被立法會趕走，去咗天美村附近天橋底，只要唔阻行人就OK！」一紥就紥到2015年6月8日，當天大批建制派議員突然離席，聲稱「要等埋發叔(劉皇發)先」，結果立法會以28比8，正式否決「831方案」。
「無數錯應該紥咗263日，因為當年學聯發起罷課，已經來到駐守！」263個白晝與黑夜，除了去醫院復診及回家梳洗，他都會在政總外，初初不讓黃太來，怕危險，但共渡數十載的另一半，又如何放心得下，結果黃太每日煮飯送到政總，「佢煮埋畀其他人，又魚又肉，慢慢影響埋好多人，好似基隆茶餐廳老闆，都送餐來畀大家食！」生命影響生命，便是如此。「佢囉，唔好學佢啊！都唔知佢玩咩，日日要拎飯你食！」一直守護在旁的黃太開口，細黃伯笑了一笑，兩人對眼，一切盡在不言中。
細黃伯與不少議員相熟，人人見到他都會和打聲招呼。「200幾日喺呢到，點會唔熟？」當年他怕立法會議員因失了人氣，又投棄權票，順水推舟讓831方案通過，所以每天早上見到議員都大叫「早晨」。
政總紥營263天抗爭
「見到曾鈺成都叫佢來傾兩句，佢最叻就係講『公眾地方有咩好傾啊？』見到湯家驊就提佢唔好投棄權票啊，佢回我『唔係唔信我啊？』」慢慢地，立法會議員無人不識這位七十多歲老伯。
263天營地生活，除了要面對橫風大雨，最難的是敵人偷襲，「點會無人來搞，成日有人向我哋掟玻璃樽，有次仲拎住幾枝電油想淋我哋，好彩糾察發現，唔係就火燒連環營！」還有一次，細黃伯在中信大廈外突然被人施襲，「打咗幾拳，我跑咗去中信入面間大家樂，佢先無追上來，好彩身體仲捱得，我無講畀黃太聽，驚佢擔心！」在身邊的黃太望住丈夫，過去了，還能怎樣？
831方案成功被否決，細黃伯目標達到，信守承諾撤離，「當時有人鬧我，喂黃伯，我哋轉咗啦，要爭取真普選，你咁就走啦？」承諾就是承諾，他目的達到，便要離開，「我都要爭取真普選，但今次紥營目的達到！」
回望歷史，社運是一場進呈，環環相扣。2014年傘運結束，兩年後爆發旺角的魚蛋革命，梁天琦等人被判入獄，黃台仰逃離香港到德國政治避護，「佢哋付出得太多，你用磚同人哋槍打，佢捉到你最少判兩年半，告你暴動。」政府總說社運有人策劃，活了七十五年的細黃伯直言，每場社會都唔會有人策劃，「社運會變成點，幾分鐘內可以好唔同，只要有一個警察射催淚彈，只要有一個抗爭者掟磚，成場運動都會唔同晒！」
2014年9月28日，警察向在金鐘一帶聚集的示威者發射87枚催淚彈，改變了整場運動，進一步激發民憤，引起國際關注，終演變成「雨傘運動」。
去年今天，2019年6月12日，警方指揮官陶輝下令射出第一發催淚彈，開槍鎮壓，聚集的市民被迫至中信大廈，險造成人踩人，林鄭仍堅持修訂逃犯條例，激發6月18日香港史上最大型的200萬人大遊行，成為整場「反修例抗爭」的轉捩點，一發不可收拾，香港命運從此改變。
「林鄭呢條友真係阿茂整餅，無嗰樣整嗰樣，成班官拎我哋幾十萬一個月，一啲政治智慧都無嘅？共產黨都笑你，以前要捉人上去坐大飛，仲要被國際講，難過登天，林鄭搞個修例，共產黨梗係好！」細黃伯怒道。
訪問當日，細黃伯指着煲底︰「之前呢到係合法示威區，依家封晒啦！」
修例一出，激起千重浪，商人劉鑾雄率先司法覆核，商界初初沒有人現身力撐林鄭，「其實最驚係班商家佬，佢哋之前有生意喺大陸，點解搵咁多錢？肯定有啲野啦，有啲非法行為，當大陸仲覺得你有利用價值，國家有難，你唔係唔課金幫下手啊？」奈何中央吹雞，牛鬼蛇神全部歸位，出稿支持修例，轉軚最緊要快。
兩次錯信共產黨
細黃伯看得通透，原來他曾經也經歷過。細黃伯中三畢業後，貪得意考上皇家警察，六六年入學堂，六七出山撞上六七暴動，「我主要坐喺警局入面做支援，新仔無得出去。」一做十年，七七年警廉衝突後，港督麥理浩下特赦令後，他決定離開，「當年好嚴，你掹把槍出來，寫報告寫死你，點同依家啲警察，犯咗事一哥訓斥兩句就得，你犯咗錯即刻就要跪低啦！
離開警隊，失去工作，他到中文大學打雜工，「做咗三年，係人生轉捩點！」三年打雜生活，工餘時細黃伯便會看書，近代史、政治理論、世界歷史樣樣睇，加上同學生傾偈，「生命影響生命，當年就係被班學生影響到，覺得我哋唔係豬，應該要有思考能力，要諗諗下一代生活！」
1981年他離開中大創業，搞服裝生意，「結咗婚，生埋幾個化骨龍，都要搵食！」70至80年香港，是黃金時期，經濟高速增長，細黃伯食正時代，生意蒸蒸日上，「嗰陣你唔使好叻，只要肯做，就一定搵到錢！」
生意愈做愈好，八十年代初中國改革開放，鄧小平開放深圳經濟特區，「當年做生意，聽鄧小平枝笛去深圳設廠投資，承包酒店服裝、旅遊項目。」八十年代深圳，荒野一片，港商北上投資，市委書記個個以禮相待，畢竟是港商送錢。「搞咗幾年發現唔對路，佢哋學到嘢，會來搵你，喂黃老闆，只要唔係殺人販毒，我都幫到你，不過我一家七口，想買層樓，借住啲來得唔得？」結果當然一借無還，在中國做生意便是如此，這叫「關係」。
直到八九六四，本來將信心押在鄧小平身上，但天安門的坦克令細黃伯徹底失望，決定全面撤資中國。當年在香港還有五六間舖的細黃伯，在舖上貼文宣，罷工罷市走上街頭，「當年咩文匯報、大公報、中國銀行都整晒橫額，以為可以改變，點知槍桿子出政權，武力不對等，鄧小平下格殺令，軍隊進城屠殺，好慘！」不少港人都押錯注，包括上任特首梁振英，他當年的廣告「強烈譴責中共當權者血腥屠殺中國人民」每年都會被人重新欣賞。
六四之後，不少港人對中國失去信心，選擇移民，略有資本的細黃伯都有此打算，一切準備就緒，「鄧小平智慧好高，出招夠狠夠辣，但同時收放自如，佢知道持續強硬，外國會制裁中國，所以六四之後就開放多幾個特區，吸引外資去投錢。」
生命影響生命
古語有云，天下熙熙、皆為利來；天下壤壤，皆為利往，全世界都是向錢看，「利益前人人都跪啦！」1990年人大通過《基本法》，香港政局轉趨穩定，細黃伯再次押注《基本法》，以為97後《基本法》可以制止中共魔爪，豈料回歸之後，人大多次釋法、2007年雙普選落空、831政改落閘，「白紙黑字寫晒，都可以唔認數，你叫我仲點信共產黨？」一次又一次被騙，他終於決心義無反顧與年輕人走上街頭，「頭兩次被人呃係我無知，依家仲叫我信佢，咁我就係白痴！共產黨連自己憲法都唔遵守，講明主席只係連任一次，佢可以改到永續！」
由八九六四，到今時今日，細黃伯抗爭三十年，國安法殺到，他無所謂懼，「人權公約講明，我哋應該要有免於恐懼嘅自由，依家呢樣都無埋，可能我走出金鐘，隨時被人拉埋，話我分裂國家，我無所謂，要拉要鎖，槍斃都好，賤命一條！」七十五歲老人，說得堅定。
毛澤東說︰「世界是你們的，也是我們的，但是歸根結底是你們的！」兩老人過七十，本來可以享受退休生活，歎世界，一班朋友飲茶吹水，「嗰個就唔係黃伯啦！」黃太笑道，聽得出她為丈夫所為而驕傲。
「時代唔止揀中黃之鋒、周庭佢哋班後生，仲有我哋呢班老嘢，哈哈！」細黃伯說。問他仍會堅持多久，他說︰「一日唔死，只要仍未改變，唔知下一代生活喺咩世界，我都會行出來。好多抗爭者都走咗(過身)，咩原因都好，人生無常，有啲嘢你唔做，只會帶住遺憾走，無意思。我行得慢，有危險惟有避一避，唔係想做英雄，但有能力出聲，都想講畀人知個真相，生命影響生命，啲後生要搵律師，要搵資助，我幫到幾多就幾多！」
過去一年，抗爭者被捕的，被打至頭破血流的數之不盡，「真係好心痛，有次喺金鐘，睇住個差佬捉住個細佬打到爆頭，好殘忍，點解可以咁？但你咬佢食啊？一年來睇得太多，可以點？惟有叫啲細佬唔好送頭，要識得走！」除了無奈，還能如何？一年過去，香港人的無力感，也是如此。
有什麼想跟年輕人說？「上善若水，敵進我退，敵退我進，留有用之軀，走更遠的路，Be Water！歷史上政權改變都唔係三幾年嘅事，三幾十年係等閒，你睇孟德拉同印度，再睇下西班牙加泰隆尼亞，搞咗十幾年都未得，唔好睇短期，記得Be Water！」
~ 完 ~
